ԺԱՄԱՆԱԿԱԿԻՑ ՏԵԽՆՈԼՈԳԻԱՆԵՐԻ ԿԻՐԱՌՈՒՄԸ ԴԱՏԱՎՈՐՆԵՐԻ ՇԱՐՈՒՆԱԿԱԿԱՆ ՎԵՐԱՊԱՏՐԱՍՏՄԱՆ ՄԵԹՈԴԱԲԱՆՈՒԹՅԱՆ ՄԵՋ
DOI-:
https://doi.org/10.53614/18294952-2026.1-194Հիմնաբառեր․-:
դատավորների վերապատրաստում, անդրագոգիկա, կրթական տեխնոլոգիաներ, էլեկտրոնային ուսուցում, խառը ուսուցում, արհեստական բանականություն, վերապատրաստման ցիկլ, դատական կրթություն։Ծանոթագրություն
Վերջին երկու տասնամյակների ընթացքում դատավորների շարունակական վերապատրաստումը կրել է հայեցակարգային (պարադիգմային) փոփոխություն՝ դասախոսակենտրոն մոտեցումից անցում կատարելով մասնակիցակենտրոն մեծահասակների ուսուցմանը։ Սույն հոդվածը ուսումնասիրում է, թե ինչպես կարող են ժամանակակից տեխնոլոգիաները, մասնավորապես՝ ուսուցման կառավարման համակարգերը, տեսակոնֆերանսները, մուլտիմեդիական բովանդակությունը, սիմուլյացիաները, իմերսիվ միջավայրերը և արհեստական բանականությունը, ինտեգրվել դատավորների շարունակական վերապատրաստման մեթոդաբանության մեջ՝ առանց անդրագոգիկայի սկզբունքները խախտելու։
Վերլուծությունը տեսական բնույթ ունի և հիմնված է դատավորների վերապատրաստման եվրոպական և միջազգային նորմատիվամեթոդական շրջանակի, մեծահասակների ուսուցման հիմնարար տեսությունների, ինչպես նաև կրթական տեխնոլոգիաների վերաբերյալ գրախոսվող գիտական հետազոտությունների վրա, ներառյալ՝ Հարվարդի համալսարանում իրականացված ուսումնասիրությունները։
Հոդվածի գիտական նորույթը կայանում է դատավորների վերապատրաստման ցիկլի չորս փուլերի՝ կարիքների գնահատման, նախագծման, իրականացման և գնահատման, հետ կապված կոնկրետ տեխնոլոգիական գործիքների համակարգված քարտեզագրման, ինչպես նաև դրանց ընտրության չափանիշների՝ մեծահասակների ուսուցման սկզբունքներից բխեցման մեջ՝ ի տարբերություն առկա գրականության, որտեղ դատավորների կրթության ոլորտում էլեկտրոնային ուսուցումը քննարկվում է առավել ընդհանուր ձևով։
Հետազոտության արդյունքները ներառում են տեխնոլոգիաների ինտեգրման փուլային մոտեցման մշակումը, արհեստական բանականության երկակի բնույթի ուսումնասիրությունը՝ որպես դատավորների կրթության և՛ առարկա, և՛ գործիք, ինչպես նաև ներդրման այնպիսի սկզբունքների քննարկումը, որոնք վերաբերում են գաղտնիությանը, դատական անկախությանը և թվային անհավասարությանը։ Ստացված արդյունքներն անմիջական գործնական նշանակություն ունեն դատավորների վերապատրաստում իրականացնող հաստատությունների համար։
